اناج میں چنا درحقیقت نہایت قوت بخش غذا ہے۔ یہ جسم کو غذائیت دینے کے اعتبار سے گہیوں سے دوسرے درجہ پر ہے۔ چنے میں سب سے زیادہ مقدار میں پروٹین پائی جاتی ہے، جو جسمانی خلیوں اور پٹھوں کی نشوونما اور خون کے سرخ خلیوں کی تعمیر اور قوت مدافعت میں اضافے کا سبب بنتی ہے اس میں آئرن بھی مناسب مقدار میں پایا جاتا ہے جو خون بنانے، جسمانی تکان دور کرنے اور قوت و توانائی میں اضافہ کے لیے بہت مفید ہے۔ چنے میں موجود ریشہ یا فائبر نظام انہضام کی اصلاح کے لیے فائدہ مند ہے۔ اس میں تھوڑی مقدار میں چکنائی بھی پائی جاتی ہے جو جسمانی نشوونما، جلد کی صحت اور وٹامنز کے انجذاب میں معاون ثابت ہوتی ہے۔ چنے میں وافر مقدار میں کیلوریز پائی جاتی ہیں جو جسم اور عمر کی مناسبت سے صحت و قوت اور توانائی میں اضافہ کے لیے ضروری ہیں۔ سبز چنے میں وٹامن A اور B کی بھی مناسب مقدار پائی جاتی ہے۔ چنے کا پودا جب بڑا ہو جاتا ہے تو دیہاتوں میں اس کی تازہ کونپلوں کو توڑ کر اس کا ساگ پکا کر کھایا جاتا ہے جو ہاضم اور مقوی ہوتا ہے۔ کابلی چنوں کا سالن اور پلائو بھی بڑا مزیدار بنتا ہے۔ انہیں ابال کر آلو کے ہمراہ خوش ذائقہ چاٹ تیار کی جاتی ہے۔ چنے کی دال پیس کر بیسن کو پانی میں بھگو کر رکھنے اور دن میں کئی بار پلانے سے پیشاب کی جلن دور ہوسکتی ہے۔ چنے کی یخنی زود ہضم اور طاقت بخش ہے۔ اس کا پانی یا یخنی بدہضمی کا علاج ہے۔ تجربات سے یہ بات معلوم ہوئی ہے کہ سبز چنے بینائی میں اضافہ کرتے ہیں۔ چنے کا چھلکا پانی میں بھگو کر رکھئے اور صبح وہ پانی چھان کر پینے سے پیشاب کھل کر آتا ہے۔ بیس میں ہلدی، سرسوں کا تیل اور حسب ضرور پانی ملاکر چہرے اور جسم پر لگانے سے رنگت صاف ہو جاتی ہے۔ بیسن جسم میں فالتو رطوبتوں کو خشک کرتا ہے۔ بیسنی روٹی زکام، بلغمی کھانسی، دمہ، قے، دست اور فساد خون کی شکایت میں مفید ہے۔ بیسن سے کئی قسم کی مٹھائیاں لڈو، پھلکیاں، پکوڑے اور کئی طرح کی ڈشز تیار کی جاتی ہیں۔ تاہم ہر چیز کے استعمال میں اعتدال اور توازن فائدہ حاصل کرنے کے لیے بنیادی شرط ہے۔ مکئی اور باجرے کی روٹی کے ساتھ چنے کا ساگ انتہائی رغبت سے استعمال کیا جاتا ہے۔